128 бүтээмжийн менежрийг цомхотгон 29 тэрбум төгрөгийн зардлыг хэмнэхээр засгийн газраас шийдвэрлэжээ

Ерөнхий сайд асан Л.Оюун-Эрдэнэ Засгийн газраа хүчтэй байлгахын тулд дэд сайдын албан тушаалыг сэргээж, УИХ-ын гишүүдээр давхар хашуулах төлөвлөгөө зохиосон ч түүнийгээ өөрчилж, төрийн өмчит компаниудад хяналт, бүтээмжийн менежерийг томилсон байдаг. Тодруулж хэлбэл эдгээр томилогдсон менежерүүд нь компанийн санхүүд хяналт тавих, мөн үр ашгийг дээшлүүлэх зорилго дор томилогдсон. Гэвч эдгээр 128 бүтээмжийн менежерийн цалин хөлс болон унаа, байр бусад хангамжийн зардалд нийт 29 тэрбум төгрөгийг зарцуулж иржээ.  Тэгвэл Монгол улсын ерөнхий сайд Г.Занданшатар Засгийн газар бүх шатанд төсвийн хэмнэлтийн горимыг сахин, үр ашиггүй зардлыг танах, төрийн чиг үүргийн давхардлыг арилгаж, орон тоог үе шаттай цөөлөх шийдвэрийг гаргасан. Энэ хүрээнд дээр дурдсан 128 бүтээмжийн менежрийг цомхотгон 29 тэрбум төгрөгийн зардлыг хэмнэхээр засгийн газраас шийдвэрлэжээ.