Москваг чиглэсэн түүхэн цохилт: Украин 500 дроноор довтолж, Оросын нийслэлд түгшүүр үүслээ

Украин улс 2026 оны 6-р сарын 18-ны өдөр Москваг чиглэсэн түүхэн дэх хамгийн өргөн цар хүрээтэй дроны цохилтыг гүйцэтгэлээ. Уг цохилтын улмаас Оросын нийслэлийн нисэх онгоцны буудлуудын үйл ажиллагаа тасалдаад зогсохгүй, хотын дэд бүтэц болон чухал байгууламжуудад их хэмжээний хохирол учраад байна.
ОХУ-ын Батлан хамгаалах яамны мэдээлснээр, Украины нийт 500 орчим дрон Оросын хэд хэдэн бүс нутаг руу нэвтэрснээс 200 орчим нь Москвад ойртох үедээ устгагдсан байна. Энэхүү довтолгооны улмаас Москвагийн олон улсын дөрвөн нисэх буудалд нийт 527 нислэг цуцлагдаж, хойшлогджээ. 
Түүнчлэн, Москвагийн Капотня дүүрэгт байрлах "Газпром" компанийн газрын тос боловсруулах үйлдвэр энэ долоо хоногт хоёр дахь удаагаа цохилтод өртөөд байна.
Цохилтын улмаас 12 сая хүн амтай Москва хотын иргэдийн дунд түгшүүр үүсэж, оршин суугчид шатахуун нөөцөлж, хувийн автомашинаараа хотоос гарахаар бэлтгэж эхэлжээ. Энэ нь дайны нөхцөл байдал Оросын нийслэлд ийнхүү бодитоор нөлөөлж эхэлснийг харуулж байна.
Украины Ерөнхийлөгч В.Зеленский энэхүү үйл явдлыг "Оросын дайны машиныг тэжээдэг байгууламжуудад цохилт өгсөн нь манай дайчдын амжилттай ажиллагааны үр дүн" хэмээн үнэлж, үүнийг бүрэн зүй ёсны үйлдэл болохыг онцолсон байна.