“Туулын хурдны зам”-ын 32 км замыг барих 2.3 их наяд төгрөгийн тендерт шалгарсан “China Hyway Group Limited” компани өөрийн нэрийг Монголд “Хятадын Хаоюань групп” гэж орчуулан гэрээ байгуулсан байна. Монгол дахь охин компани “Хаоюань женерал констракшн” ХХК-ийн дансаар урдчилгаа төлбөр нь шилжсэн гэсэн үг.
Хонконгийн бүртгэлээс харахад энэ хоёр нэр нэг компанид хамаарах нь батлагдаж байгаа юм.
Яагаад нэрээ сольж, тендерт орсон эсэх нь тодорхойгүй ч өмнө нь монголд 2012 онд Баянхошууны 3.4 км зам засварын ажил хийх гэж, удаашрал гацалт үүсгэж асуудал дагуулж байсантай нь холбоотой байж болох юм. Туулын хурдны замын тендер шударга явагдсан эсэхэд эргэлзээ төрүүлж байна.
“China Hyway Group Limited” компани 2008 онд Хонконгод үүсгэн байгуулагдсан бөгөөд 2009 онд Монголд “Хувай Монголиа” ХХК-ийг байгуулж, орон сууц, оффис барилга, ордын лицензийн бизнес эрхэлж эхэлсэн байна.
“China Hyway Group Limited” компани ихэвчлэн зүүн өмнөд Ази болон Африкийн ядуу буурай орнуудад зам засвар, барилга байшин барих, гол нуур цөөрмийн жижиг гүүр барих зэрэг ажлын тендер авдаг байна. Хятадад төдийлөн бүтээн байгуулалт хийдэггүй. Нэр нөлөө бүхий биш. 2008 онд байгуулагдсан гэдэг ч тэр нь баталгаатай эсэх нь эргэлзээтэй 5 ажилтантай ч байж болзошгүй, зөвхөн тендер аваад туслан гүйцэтгэхүүнийг ажиллуулдаг гэх мэт албан бус мэдээллүүд монгол, хятадын сайтуудаас илэрч байна.
Нийтлэлч:Н.Ганаа
Сэтгэгдэл (0)
Одоогоор сэтгэгдэл байхгүй байна. Эхний сэтгэгдэлээ үлдээнэ үү!