АНУ цэргийн ажиллагаагаа үргэлжлүүлж, Иран хөршүүд рүүгээ довтолж эхэллээ

2026 оны 3 дугаар сарын 7-нд Израил болон АНУ-ын зэвсэгт хүчин Ираны нийслэл Тегеран хотод өгөх агаарын цохилтоо эрчимжүүллээ. Энэ хүрээнд Тегераны Мехрабад олон улсын нисэх буудлыг онилж, Ливаны "Хезболла" бүлэглэлд зэвсэг нийлүүлэхэд ашигладаг байсан 16 нисэх онгоцыг устгасан байна.

Түүнчлэн Израилын арми Ираны Исламын хувьсгалт гвардийн агаарын довтолгооноос хамгаалах төвийг устгаж, Исфахан хот дахь пуужингийн баазуудад хүчтэй цохилт өгчээ. Үүний хариуд Иран улс хөрш Ирак болон Арабын Нэгдсэн Эмират Улс (АНЭУ) руу хариу довтолгоо хийж эхэлснээр бүс нутгийн мөргөлдөөн улам даамжирч байна.

Улс төрийн түвшинд, Ираны Ерөнхийлөгч Масуд Пезешкиан нөхцөл байдлыг намжаах, буулт хийх байр суурь илэрхийлсэн ч, тус улсын өндөр дээд удирдагчдын нэг Али Ларижани Д.Трампаас хариугаа заавал авна хэмээн хатуу мэдэгдлээ. Харин АНУ-ын Батлан хамгаалахын сайд Пит Хегсет Ираны эсрэг цэргийн ажиллагаа цаашид ч үргэлжилнэ гэдгийг дахин нотлов.

Ойрх Дорнодын энэхүү хурцадмал байдал олон улсын аюулгүй, тогтвортой байдалд хэрхэн нөлөөлөхийг дэлхий нийтээрээ анхааралтай ажиглаж байна.