АНУ-д цасан шуурга гамшгийн хэмжээнд хүрч, 20 мужид онц байдал зарлалаа

800,000 гаруй өрх тоггүй болж, өвлийн шуурганы улмаас хүний амь эрсэджээ АНУ-ын өргөн газарыг хамарсан хүчтэй цасан шуурга болон борооны улмаас тус улсад онцгой нөхцөл байдал үүсчээ. Ням гарагт эрчимжсэн цасан болон мөсөн шуурганы улмаас үндэсний хэмжээнд тээвэр логистик, эрчим хүчний салбар тэг зогсолт хийхэд хүрээд байна. Цаг агаарын хүндрэл нь зөвхөн тээврийн салбараар хязгаарлагдсангүй, эрчим хүчний сүлжээнд мөн том хохирол авчирчээ. Даваа гарагийн эхний цагийн байдлаар 800,000 гаруй хэрэглэгч цахилгаан эрчим хүчний хязгаарлалтад өртөөд байна. Салхины хурд 50 км/ц хүрч цахилгаан дамжуулах шугам болон тулгуур багануудад их хэмжээний мөсөн ачаалал үүсгэснээр сүлжээний гэмтэл гарах нөхцөлийг бүрдүүлжээ. Харамсалтай нь цаг агаарын нөхцөл байдлаас үүдэлтэй 29 иргэн амь насаа алдсан тохиолдол 1-р сарын 27-ны байдлаар бүртгэгдсэн байна. Үүсээд буй нөхцөл байдалтай холбогдуулан АНУ-ын 20 мужид "Онц байдал" зарлажээ. Тодруулбал Нью-Йорк хотын нийтийн сургуулиуд сургалтын үйл ажиллагааг бүрэн цахим хэлбэрт шилжүүлсэн бол Вашингтон Д.С хот дахь Холбооны засгийн газрын бүх оффисууд үйл ажиллагаагаа түр зогсоож, 279,000 төрийн албан хаагчдыг зайнаас ажиллахаар шийдвэрлэжээ. Цаг агаарын онц ноцтой энэхүү үзэгдэл нь дэд бүтэц, эрчим хүчний салбарыг саатуулж, эдийн засаг болон хүний амь насанд нөхөж баршгүй хүнд гарз хохирол учрууллаа.